1. المدير العام

    المدير العام أدارة موقع أكتب كود

    أكمل في طريق البرمجة ولا ماكملش؟
    هاقول شوية حقائق محبطة وبعدين هاجاوب:
    * الشهادة ليست ضرورة لمهنة البرمجة.. ولكن ده مش معناه إن كل الناس اللي على كوكب الأرض ممكن يبقوا مبرمجين.. المهنة محتاجة موهبة ذهنية وشغف مش موجودين عند كل الناس

    * تعلم البرمجة بجهود ذاتية أو التخرج من كلية حاسبات أو هندسة كمبيوتر هو الخطوة الأولى في مشوار صعب للحصول على شغل في مجال البرمجة

    * الكورسات بعد كده بتسهلك الدنيا جدل لانها بتحك على اول الطريق الصحيح و بتابعك فى كل حاجه و بتاخد خلاص الخبرات بتاعه الانستراكتور فى كام شهر و بالتالى بتقدم اسرع فى المجال

    * السفر خارج مصر ممكن عن طريق البرمجة، بس لازم تفتكر إن آلاف المبرمجين المحترفين في مصر بيعملوا إنترفيوهات كل أسبوعين تلاتة في شركة أوروبية وبيترفضوا، بسبب التكنيكال إنترفيو، أو بسبب اللغة والتواصل

    جايز الكلام ده محبط، بس قمة الإحباط بالنسبة لي هي الأمل الزائف والعشم في حاجة ممكن ماتحصلش
    والأسوأ من كده هو الإنطباع اللي ممكن ييجي للواحد إن الكوكب كله إتعلم برمجة وأنا الوحيد اللي فشلت
    الكلام ده غلط تماماً..

    فيه ناس عباقرة بس مخها مش بيمشي في البرمجة..
    وزي ماقلت في بوست سابق، كان ليا زمايل في الكلية (هندسة القاهرة قسم إتصالات) فاشلين تماماً في البرمجة وحالياً هما برة مصر دكاترة في الجامعة في مجالات الإتصالات الكهرومغناطيسية،
    وناس تانية بيصمموا كروت شبكات في أمريكا.. وناس تانية في مجالات هندسية متقدمة جوة مصر... وكلهم كانوا بينجحوا بالعافية في مادة البرمجة اللي بناخدها كل سنة
    يعني ممكن واحد عنده مهارات وعلم بس مايعرفش يبقى مبرمج، ويبقى حاجة تانية أحسن بكتير
    مش حاجة تعيب الواحد إن البرمجة تبقى مش مناسبة لطريقة تفكيره.. لأن فيه حاجات تانية كتير محتاجة مهارات ذهنية معينة لو واحد مبرمج إشتغل فيها هايفشل فشل ذريع

    طب يعني أكمل ولا ماكملش يا مُحبط يا سخيف؟
    كمل طريق البرمجة لانه بيفتح مداركك و بيحسن طريقتك على التفكير و حتى لو مشهتشتغل بالبرمجه فهى هتساعدك جدا فى شغلك الاساسى و تخليك تقدر تطور شغلك بش مذهل

    لو كان اللي انت بتعمله دلوقتي حالاً وانت بتتعلم وبتستكشف وبتجرب وبتسأل..
    لو كان الموضوع ده في حد ذاته ممتع بالنسبة لك.. يبقى كمل
    لكن لو إنت حاسس إن الطريق صعب وطويل وممل وسخيف وإنك بتنحت في الصخر، ومش مبسوط، والموضوع ضاغط على أعصابك ونفسيتك، وبتقول هاستحمل كل الضغط ده علشان لما أتعلم، هالاقي شغل، ولما ألاقي شغل هايبقى عندي خبرة، ولما يبقى عندي خبرة هاقبض فلوس كويسة وهاسافر برة مصر
    لو انت بتكمل فقط علشان توصل لكده، وكل حاجة تانية سودة وسخيفة وصعبة.. نصيحتي ليك ماتكملش
    وده مش عيب فيك.. ده مجرد إختلاف في المواهب
    وإنت بكل تأكيد موهوب في حاجة تانية، لو اكتشتفتها، هاتلاقي نفسك نجحت فيها بكل سهولة وعملت فلوس وحققت ذاتك أكتر بكتير من أي مبرمج

    آخر ملحوظة هامة جداً: علشان تحكم على طريق البرمجة إنه سخيف أو ممتع لازم تدي لنفسك وقت في الأول... مش بعد يومين تقول الطريق سخيف ومش هاكمل.. لأن أي حاجة في أولها مش ممتعة حتى لو انت موهوب
    الكلام السابق هو للي بقاله كتير شهور أو سنة أو أكتر وبإنتظام

    ملحوظة أخيرة: أنا آسف لأي حد شايف كلامي محبط.. وفعلاً أنا كتبت الكلام ده علشان صعبان عليا ناس كتير متعشمة وحاسة إن الموضوع سهل ومتاح بس هو لو ضغط على نفسه وقهر نفسه وكافح هايوصل.. وإنه لو ماوصلش يبقى هو مهمل وضيع فرصة البرمجة من إيديه
    الفكرة دي هي الإحباط الحقيقي، إن الواحد نظرته لنفسه تبقى قليلة.. رغم إن الحقيقة الواضحة زي الشمس إن مواهب الناس مختلفة.. ومش كلنا ممكن ننجح في كل حاجة
     
جاري تحميل الصفحة...
الوسوم: